नवनिर्वाचित सांसद पौडेलको फेसबुक स्टाटस चर्चामा
कास्की, २५ फागुन ।
राष्ट्रिय स्वतन्त्र पार्टी (रास्वपा)का गडकराज पौडेल (गणेस पौडेल) कास्की– १ बाट प्रतिनिधी सभा सदस्यमा निर्वाचित भएपछि उनले सामाजिक सञ्जाल फेसबुकमार्फत सार्वजनिक गरेको एक स्टाटस चर्चामा आएको छ।
पौडेलले “अबका ५ वर्ष मैले नगर्ने काम” शीर्षकमा १३ बुँदे प्रतिबद्धता सार्वजनिक गर्दै आफूबाट अपेक्षा नगर्नुपर्ने कामहरू स्पष्ट पारेका छन्। उनले पारिवारिक, सामाजिक वा राजनीतिक सम्बन्धको आधारमा कसैलाई जागिर, नियुक्ति, सरुवा वा बढुवा मिलाइदिन नसक्ने स्पष्ट पारेका छन्।
त्यसैगरी स्कुल वा क्याम्पसमा स्कलरसिप मिलाइदिन, ट्राफिक नियम उल्लङ्घनपछि कारबाहीबाट बचाउन सोर्स–फोर्स लगाइदिन वा विभिन्न आपराधिक मुद्दामा भनसुन गरेर बचाइदिन पनि आफू तयार नभएको बताएका छन्।
उनले लागूऔषध ओसारपसार, ठगी, जालसाजी, कुटपिट, चोरी–तस्करी जस्ता घटनामा कसैलाई कानुनी कारबाहीबाट जोगाइदिन नआउने बताएका छन्। साथै महिला, दलित, यौनिक अल्पसंख्यक तथा सिमान्तकृत समुदायमाथि हुने हिंसा वा अन्यायका घटनामा उल्टै कडा रूपमा उभिने बताएका छन्।
सांसद पौडेलले ठेक्कापट्टा, टेन्डर मिलाइदिन, विश्वविद्यालय वा विभिन्न प्रतिष्ठानमा मनोनयनका लागि सिफारिस गर्न तथा सरकारी प्रक्रियामा छोटो बाटो खोज्न सहयोग माग्न नआउन पनि आग्रह गरेका छन्।
त्यस्तै सरकारी स्रोतसाधन निजी प्रयोजनका लागि प्रयोग गराउन, विकास बजेट आफ्नै टोल वा गाउँमा मात्र हालिदिन वा सरकारी पदको दुरुपयोग गरेर कसैलाई दबाब दिन सहयोग नगर्ने उनले बताएका छन्।
स्टाटसको अन्त्यमा उनले “मैले तपाईंलाई भोट हालेको हुँ” भन्दै बिहेवारी, व्रतबन्ध, पास्नी वा भोजमा बोलाउन आवश्यक नरहेको उल्लेख गरेका छन्। तर दुःख वा मरण परेको अवस्थामा भने सकेसम्म आफैँ उपस्थित हुने उनले बताएका छन्।